Terras de Iria
Terras de Iria comprende os concellos de Padrón, Rois e Dodro. Correspóndese coa coñecida Comarca do Sar. Estas terras, que espertaron xa o interese dos romanos, ofrécenlle ao visitante un riquísimo legado cultural, etnográfico, patrimonial, natural e gastronómico.
Nas Terras de Iria nace o Camiño de Santiago, tras a chegada do corpo do Apóstolo Santiago ao antigo porto de Iria Flavia. Nestes paraxes impregnados de cultura xacobea viviron autores galegos do talle de Rosalía de Castro e do Premio Nobel Camilo José Cela. A fertilidade da zona propicia que sexamos un referente gastronómico grazas aos famosos pementos de Herbón, ademais de agochar tamén importantes ecosistemas como as brañas de Laíño, unha das zonas húmidas máis grandes de Galicia.